來自Happy的小錦囊

1. 父母的回應十分重要

長大後，青年可能會開始要求更多自主權，令家長或教師認為他們開始變得反叛，但其實當他們向長輩發出提問，也是真正在尋求成年人的意見。如果我們以偏概全，先入為主，拒絕了解問題的全貌，年青人可能會認為自己的問題被輕視，導致日後更少與長輩溝通。 

2. 聆聽時要保持不批判的態度

由於社會對精神健康的避諱和偏見，在精神健康困境內掙扎的人可能會為自己打上標籤，或對自己形成偏見。將精神健康話題普及化以及保持不批判的態度可以促進社會接受這些話題，從而令有需要的人更容易開口求助。

3. 一切總會過去

無論此刻正在面對什麼困難，我們都有力量去克服，所有難關總會成為過去。

純文字版本

我叫做Happy，係一個雙子座嘅女仔，而我對雙子座嘅理解同定義，都好取決於我嘅情緒。我之前讀過其他科，而家就讀緊psycho (心理學)，將來想讀社工。其實我係長大後，透過做下唔同嘅personality test (性向測試)，了解多咗精神健康，先真正認識同了解自己。

以前嘅我曾經唔係好潔身自愛，認為出賣或者犧牲自己嘅身體就可以獲得自己想得到嘅愛、關心，同人際關係。我記得喺我中二個年，有日上緊家政堂，整緊嘅係檸檬蛋糕，我被叫左入社工室，留咗整整一日。嗰一刻嘅我好無助、好嬲，同時情緒好複雜。

直至傍晚，我父母同埋哥哥一齊出現喺社工室，學校通知我需要暫時停學，甚至已經報警處理，我需要定時去落口供。返到屋企，我被屋企人沒收咗手機，困左我喺房，我開始喊，因為我連為自己解釋嘅時間同空間都無。面對住四面牆，我嘅恐懼就愈嚟愈大，度日如年，訓唔安食唔落、失眠、覺得成身無力。曾經，我有諗過不如一了百了，我而家同抹殺左自己嘅將無分別…… 但我無勇氣踏出個一步，而我嗰時真係覺得自己好無用。

當我復課之後，我變得好難同人相處，內心好怕人地問起、怕人唔接受我。我每日都扮開心扮積極，慢慢我身邊就開始無朋友，我亦都怕咗分組同團體活動，我變得唔鍾意返學、討厭自己。

由於我好怕自己孤單一個人，所以我喺中學生涯不停拍拖，希望搵到人接受自己，搵到人愛。但我都好清楚我嘅內心好孤單，我相信呢件事會影響我將來，我曾經認為：發生咗呢件事，我一定選唔到港姐啦，我就好似一個「唔出得大廳」嘅人，永遠唔再有仼何光芒。

我亦開始變得自暴自棄，覺得反正都無人鍾意我，點解我要討好其他人？我經常同人嘈交，喺班房度鬧人，面對任何唔如意嘅事，我都會鬧一餐。我返學開始遲到，因為咁就唔駛自己一個食lunch。而我認為因為自己係雙子座，所以比其他人更emotional (情緒化) 係正常。我變得好aggressive (挑釁性)，亦唔想再成為人地嘅負擔。我討厭每一個承諾會陪伴我，但最後又離開我嘅人。

聽到呢度，可能大家都會有個問題：點解我唔嘗試揾其他人協助，搵一個出口俾自己？我第一次求助係向我嘅父母，佢地嘅回答係好後悔當初無鬧我，如果鬧左我，我就唔會咁難教。但其實我想要嘅，只不過係佢地嘅關心。我先係呢件事嘅受害者，被人傷害、威脅、人身攻擊，我都同自己講捱過去，因為我認為我嘅父母唔提起，就即喺無事，係往後嘅日子我就選擇自我消化。

我一直都好想知道其他人點睇我，同時我又好怕自己再次受傷，所以我不停嘗試蜻蜒點水咁講下，話俾人知我嘅過去，每一次講完又覺得自己有得著。有一次，我身邊嘅朋友對我講：「如果可以早啲認識你，陪伴你就好。」我好記得呢句說話，因為原來真係有人可以接受到我嘅過去，亦令我知道原來過去只係過去。

我而家見緊心理輔導，大約半年前開始，我好想知道到底我呢啲「奇難雜症」有無得救，好想知道我到底係一個點樣嘅人，我想同自己嘅過去和解。而最令我深刻嘅係對上一次見輔導員，佢問左我一個問題：面對咁多種聲音，我又曾經咁在意其他人嘅睇法，我到底take咗當中幾多走呢？呢個係一個好深嘅問題，雖然我到而家都無答案，但的確如果全部都take晒，會好攰，而全部都唔take嘅話，就會原地踏步。我相信我需要更多嘅時間去揾答案，但搵呢個答案嘅路，應該會係一個好嘅開始。

最後，我想同過去嘅自己、呢度嘅各位講，無論係經歷過，定經歷緊啲咩，每一次經歷都係獨一無二，最重要係要潔身自愛，唔係仼性就叫做自愛，亦都唔好比自己仼何藉口，覺得「我就係咁架啦」「我就係咁嘅性格」「我就係咁大脾氣」….. 要尊重自己，好好溫柔善待每一個部分嘅自己，無論面對緊咩困難，你都會克服到、都會成為過去。